A Concellería de Promoción Económica entregará 50 premios de 60 euros aos clientes do comercio local a través da campaña Volta ao Cole 2021

• Estará activa entre os días 1 e 20 de setembro co obxectivo de incentivar o consumo de proximidade e mellorar a competitividade dos pequenos negocios neste inicio escolar
• A iniciativa prevé acadar a participación de 400 comercios, distribuíndo 40.000 boletos ‘rasca e gaña’ en paquetes de 100 unidades e 400 carteis para pegar nos escaparates

Mellorar a competitividade dos pequenos negocios e incentivar o consumo local neste inicio de curso son algúns dos obxectivos cos que a Concellería de Promoción Económica pon en marcha unha nova edición da campaña Volta ao Cole que, en plena remisión da pandemia, chega como un maná tanto para os responsables das tendas como para os seus clientes. A iniciativa de dinamización económica, que permitirá dotar dunha maior visibilidade e atractivo ao comercio local con escaparates caracterizados mediante unha cartelería común en formato redondo, empregará, ao igual que na súa edición anterior, un sistema de ‘rasca e gaña’, repartindo 50 premios por valor de 60 euros entre os consumidores afortunados (un total de 3.000 euros).

A campaña, que foi presentada esta mañá na Praza de España nun acto protagonizado polo tenente de alcalde e concelleiro de Educación, Tino Fernández, e a concelleira de Promoción Económica, Yoya Blanco, e no que estiveron acompañados polo concelleiro de Desenvolvemento Sostible, Iván Puentes, e a responsable da firma Pontevedra Digital (encargada do seu deseño e coordinación), Marga Caeiro, está preparada para a participación de 400 comercios, entre os que se distribuirán desde hoxe 40.000 boletos ‘rasca e gaña’ en paquetes de 100 unidades e 400 unidades de cartelería para pegar nos escaparates. En opinión de Fernández, “nun momento no que parece que comezamos a ver a luz ao final do túnel, en plena fase de vacinación dos nosos adolescentes e co comezo do curso escolar ás portas, a Volta ao Cole suporá un sopro de aire fresco para os ánimos das familias e do noso comercio local”.

Segundo explicou Yoya Blanco, “a campaña está destinada ao comercio local con venda a pé de rúa en xeral, apostando non só polos sectores directamente vencellados á volta ao cole, senón tamén apoiando a calquera outro negocio de proximidade”. “Quedan excluídas desta promoción -aclarou a concelleira socialista- as grandes cadeas ou franquías, os profesionais da perruquería e da estética, as farmacias e os supermercados, froiterías e tendas de alimentación, así como a hostalería e restauración, as empresas de servizos e, en xeral, todos aqueles profesionais que non realizan venda de produtos”. 

A iniciativa estará activa entre os días 1 e 20 de setembro. Os comercios entregarán os ‘rasca e gaña’ aos clientes no momento de realizar as súas compras e aqueles que resulten premiados poderán ser trocados por produtos e servizos en calquera dos establecementos adheridos durante todo o mes de setembro. O listado de firmas participantes estará publicado na páxina web do Concello de Pontevedra (pontevedra.gal).