O Concello de Pontevedra recibe mañá a visita oficial do director xeral de Tráfico, Pere Navarro, e da directora do Observatorio Nacional de Seguridade Viaria, Anna Ferrer para coñecer o modelo de cidade de Pontevedra, así como a implantación de medidas de mobilidade e seguridade viaria que fan da capital do Lérez un referente en todo o Estado.
A visita é froito do convite persoal do alcalde, Miguel Anxo Fernández Lores e do encontro que mantivo con Pere Navarro no segundo Encontro de Cidades pola Seguridade Viaria celebrada en febreiro deste ano na cidade de Córdoba, onde Pontevedra recibiu o premio da Dirección Xeral de Tráfico á mellor práctica urbana de seguridade viaria.
O Concello de Pontevedra programou unha xornada de traballo para mañá, que rematará cun acto de homenaxe ás vítimas de accidentes de tráfico ao que quixo asistir persoalmente Pere Navarro, que estará acompañado de Anna Ferrer, directora do Observatorio Nacional de Seguridade Viaria, que xa visitou Pontevedra en xullo de 2010.
O programa da xornada comeza arredor das 10.15 ou 10.30 coa chegada do director xeral de Tráfico á Xefatura provincial de Tráfico situada na rúa Joaquín Costa. Alí será recibido pola xefa provincial de Tráfico, María Victoria Gómez, así como polo alcalde Miguel Anxo Fernández Lores e a concelleira de Protección Cidadá, Carme da Silva.
Arredor das 11.00 horas iniciarán un paseo pola cidade para coñecer a transformación urbana de Pontevedra e as medidas de convivencia e seguridade viaria implantadas no centro urbano. Arredor das 11.30 horas chegarán a Xefatura da Policía Local, onde coñecerán o centro de control do tráfico da man do intendente principal, Daniel Macenlle.
Ademais das zonas de coexistencia e peonís, o Concello tamén quere que Pere Navarro coñeza outras medidas de seguridade viaria implantadas na cidade, polo que programa unha visita en coche por distintas rúas do centro e o extrarradio da cidade.
Sobre ás 12.30 horas, o director xeral de Tráfico asinará no Libro de Honra do Concello e manterá un encontro cos medios de comunicación.
O acto en recordo ás vítimas de accidentes de tráfico celebrarase ás 18.30 horas no Café Moderno. Intervirá o director xeral de Tráfico, Pere Navarro, ademais de Anna Ferrer, a vicepresidenta de Stop accidentes, Jeanne Picard, o concelleiro de infraestruturas e de Protección cidadá, César Mosquera e Carme da Silva, e o alcalde que pechará o acto.
A esta homenaxe está convidada toda a sociedade pontevedresa, ademais de entidades locais e provinciais.