- A activista trans e licenciada en Dereito especialista en temas de xénero e violencia machista impartirá o vindeiro día 27 de novembro este curso formativo, promovido pola Concellería de Igualdade
A activista trans Ada Otero, licenciada en Dereito especializada en violencia machista e temas de xénero, impartirá o vindeiro mércores 27 de novembro un curso orientado a formar e sensibilizar á Policía Local de Pontevedra no axeitado tratamento das vítimas de LGTBIfobia e de delictos de odio. Na xornada formativa, promovida pola Concellería de Igualdade no marco do programa municipal pola diversidade sexual Pinto e Maragota, abordaranse problemáticas como a situación xurídica do colectivo LGTBI, os prexuízos, o tratamento nos medios de comunicación, a situación das agresións LGTBIfóbicas e as actuacións fronte as súas denuncias.
O curso desenvolverase na Aula de Formación da Policía Local (na sede situada na rúa Alexandre Bóveda) en horario de mañá e terá unha duración dunhas tres horas, de 9.00 a 12.00 horas. Segundo explica a concelleira de Igualdade, a socialista Paloma Castro, “a actividade está destinada a persoal da Policía e do Centro de Información á Muller (CIM), así como a traballadoras e traballadores da área de Servizos Sociais.
“A iniciativa -sinala a edil do PSOE- resposta á necesidade de informar, formar e concienciar ás empregadas e empregados públicos locais, especialmente en ámbitos tan sensibles como os da Policía e os Servizos Sociais, sobre a situación social e legal e as necesidades e problemáticas específicas do colectivo LGTBIQ+. Porase especial énfase no axeitado tratamento das vítimas de delictos de odio”.
Na súa ponencia, Ada Otero fará unha introdución sobre a diversidade sexual e de xénero, o colectivo LGTBI, o significado de cada unha das siglas, os prexuízos que derivan en LGTBIfobia e as problemáticas ás que se enfrontan na actualidade (e nomeadamente ás agresións). A continuación, a activista abordará cuestións como a desprotección xurídica que padecen, a inapropiada cobertura e difusión que se fai en comunicados e medios de comunicación, as actuacións que deben seguirse ante agresións LGTBIfóbicas ou denuncias e as especificidades da realidade trans.
Tal e como suliña a propia Otero, este curso “tenta ofrecer unha resposta á demanda dos profesionais de dispoñer de información actualizada e transversal, facendo fincapé non só na concienciación e explicación de conceptos básicos, senón tamén na necesidade de realizar un diagnóstico da situación e de darlles a coñecer os mecanismos legais actuais do colectivo LGTBI”. “Hai unha serie de problemáticas coas que os axentes da Policía Local se poden atopar no desempeño das súas funcións e esta xornada axudaralles a coñecer a que se enfrontan e como facelo”, afirma a activista trans.
Paloma Castro lembra que esta mesma semana ven de conmemorarse o Día da Memoria Trans (onte, mércores 22 de novembro), “en honor ás vítimas da represión franquista”, e que, “se ben a lexislación ten dado pasos de xigante, a plenitude de dereitos do colectivo LGTBIQ+ é aínda unha conta pendente da nosa sociedade”. “Actividades formativas como esta fanse imprescindibles para concienciar, sensibilizar e protexer os seus dereitos”, engade a concelleira.