Xa están na rúa (nos colexios) os 2.000 exemplares do terceiro número do “Cartafol do Lérez”, o xornal no que os alumnos de terceiro ciclo de Primaria do concello envorcan toda a creatividade que bule no obradoiro de escrita creativa que promove a Concellería de Educación.
O concelleiro, Agustín Fernández, desprazouse ao colexio Vilaverde (Mourente) para entregar as primeiras copias dunha publicación que a Concellería edita en colaboración coa editorial Kalandraka e que é xa unha referencia. Este novo número é o primeiro dos dous que se editarán durante este curso. Ademais da súa versión en papel pode consultarse na Internet, ou mesmo descargarse no blog (https://www.ocartafoldolerez.org).
Actividades de animación á lectura existen moitas, pero de animación á escrita non tantas, afirma o concelleiro. Agustín Fernández está moi satisfeito do éxito colleitado polo “Cartafol” como fórmula para incentivar un xeito aberto e alternativo de aprendizaxe que vai máis alá do Ensino regrado e academicista. É un intento, engade o concelleiro, de crear cidadáns con habilidades lectoras e dotados para a imaxinación e a escrita creativa. En suma, cidadáns máis cultos e, polo tanto, máis libres.
O concelleiro de Educación destaca tamén que este programa supón unha forte aposta polas bibliotecas escolares. Cómpre reforzar estes espazos, dotándoos de actividades e tamén, por suposto, de libros. Cada colexio participante recibe un lote de 20 títulos do catálogo da editorial pontevedresa.
Unha vez máis a calidade e a imaxinación desbordante dos rapaces é a protagonista deste número que chega como peche do mes do Día das Letras Galegas. Os nenos e nenas de sexto do colexio Marcos da Portela (Monte Porreiro) elaboraron historias a partir dos cadros máis coñecidos do Museo de Pontevedra. Os do San Martiño (Salcedo) participaron nun safari literario. Os do Froébel metéronse na pel dos oficios de xornalista, mariñeiro e mecánico. Mentres, en San Bieito de Lérez seguían as pegadas de Gianni Rodari para crear relatos divertidos. O Cartafol dedica as súas páxinas centrais ás actividades nas bibliotecas, sensibilízase co problema dos animais abandonados e, finalmente, pecha coa entrevista dos rapaces do colexio Vilaverde a Xico de Cariño, veterano da música galega.
Nesta nova campaña, o programa pasou por nove colexios para chegar a preto de 500 alumnos de 10 a 12 anos. Do éxito do programa dá boa conta o agradecemento expresado polo corpo docente de todos os colexios.
Os obradoiros teñen unha duración dunha hora por sesión e neles os rapaces son introducidos ao pracer da lectura, trabállase a sensibilidade estética, tanto no plano literario como no plástico, e desenvólvese a creatividade. Sen embargo, a nota máis distintiva é que se traballan as técnicas da redacción, o que permite acadar textos de gran calidade e desbordantes de imaxinación. Este ano, como novidade e para incidir aínda máis na asimilación dos conceptos, realízanse dous obradoiros por curso.