O concelleiro de Infraestruturas, César Mosquera fixo balance esta mañá -no remate do curso político- das medidas de mobilidade implantadas no ámbito de Echegaray e Alfonso XIII. Segundo o concelleiro, a alternativa ofrecida aos pais do Colexio San Xosé foi ben entendida e acatada. Na actualidade estacionan na rúa Serra e está a funcionar ben, segundo César Mosquera.
Os datos de aforo de vehículos nas rúas nas que se adoptaron medidas de mobilidade tamén revelan bos datos. En Alfonso XIII deixaron de pasar a practica maioría dos coches, xa que o facían uns 4.500 a diario.
No tramo entre Subdelegación do Goberno-Alameda-Echegaray pasáronse duns 5.000 a uns 3.500 vehículos/diarios.
E no tramo entre San Roque-Alameda-Echegaray pasouse duns 10.500 vehículos/diarios a 9.000.
Mosquera explicou que o tramo no que o Goberno está máis preocupado neste momento é a avenida de Raíña Vitoria, xa que foi o punto da cidade onde houbo máis atropelos o pasado ano.
Para correxir situacións como esta poñeranse en marcha reaxustes:
- Entorno do ambulatorio. Fixaranse tres prazas con tarxetas autorizadas para os vehículos dos profesionais que teñen que facer asistencia a domicilio (médicos ou enfermeiros). Esta medida será de carácter inminente, unha vez que a chuvia permita pintar as prazas.
- Avenida de Raíña Vitoria: instalaranse pasos de peóns elevados para calmar o tráfico e sinalizarase toda a zona a 20km/h. Esta medida porase en marcha logo das festas do verán.
- Alfonso XIII: a petición dos representantes dos Camiños Escolares do Colexio das Doroteas, estúdase a peonalización da rúa.