O próximo sábado, 12 de xullo, celébrase o XIV Triatlón Cidade de Pontevedra, proba clasificatoria para o Campionato Galego 2014. Agárdase unha participación próxima aos 600 deportistas entre as categorías inferiores, populares e federados, polo que a proba pode converterse na que máis concorrida de cantas se celebran no calendario galego.
O evento foi presentado hoxe polo concelleiro de Deportes, Agustín Fernández, acompañado de Luis Piña, vicepresidente da Federación Galega de Triatlón, e Indalecio Viñas, en representación do Club Triatlón Galaico Cidade de Pontevedra.
Fernández destacou que o triatlón forma parte dos sinais de identidade deportiva de Pontevedra e que cidade ten un vínculo emocional con esta especialidade, ata o punto de que sen o triatlón, o Deporte non sería o mesmo en Pontevedra.
O torneo retorna ao seo formato habitual despois de que o ano pasado compartira escenario co SERTRI, da Cadena Ser.
A competición desta fin de semana comezará ás 11 horas coas categorías inferiores (benxamín, alevín, infantil e cadete). Ás 15.30 horas chegarán os populares (con licenza para un día), que competirán sobre distancias minisprint (0,3 Km natación, 10 Km ciclismo e 2.500 metros de carreira a pé).
O resto das especialidades compiten la distancia sprint (0,750 Km de natación, 20 Km en bicicleta e 5 Km a pé). Ás 16.30 horas sairán os triatletas da proba masculina para os clasificados sen tempos de corte. A proba feminina será ás 17.50 horas. Finalmente, a proba masculina para os deportistas que teñen acreditado tempos de corte, será ás 18.00 horas. Entre os deportistas inscritos figura a selección mexicana, e tamén algúns chilenos e arxentinos.
Os circuítos de ciclismo e carreira a pé están deseñados como nos últimos anos ao redor da avenida de Bos Aires e a avenida de Compostela. Non obstante, na avenida de Compostela só se ocupará unha das calzadas.
O torneo está dotado con premios de 150 euros para os primeiros clasificados masculino e feminino, 100 euros para os segundos e 50 euros para os terceiros. Os primeiros clubs masculino e feminino obterán unha recompensa de 200 euros.