A parroquia de Salcedo inaugura mañá o seu centro social nun acto aberto a toda a parroquia a partir das 19.00 horas. Este centro que tivo un custe de 708.522,74 euros, contribúe a crear o núcleo de centralidade parroquial na zona na que se atopan os colexios, a Casa da Música, a Casa do monte e o novo parque infantil. Tamén está ao carón da igrexa e do cemiterio.
Na inauguración están convidados todos os grupos municipais e todas as agrupacións e colectivos de Salcedo e está prevista a actuación dun dúo de arpa formado por Paula Oanes e Lorena Reinaldo, e a intervención dos responsables veciñais Ramón López e Fernando Pintos, o concelleiro delegado da parroquia de Salcedo, Demetrio Gómez e o alcalde, Miguel Anxo Fernández Lores.
O Local ten unha superfice de 650 metros cadrados que inclúe zonas de estancia, reunións, baños, espazo para obradoiros e dúas salas amplas con pareces móbiles que permite crear un espazo de escenario e platea, no coas de darse algunha representación. Ademais, a fachada tamén se abre ao exterior de tal xeito que a platea pode ampliarse ate ter unha capacidade de varios centos de persoas.
O edificio está totalmente equipado con mobles, equipos audiovisuais, informática, electrodomésticos por se fan algún curso de cociña… E tamén está totalmente urbanizado o exterior.
Este proxecto foi negociado dende o primeiro momento co Consello parroquial, e incluíronse as peticións de todos os colectivos que o van usar a partir de mañá.
Pero o Centro Social non é a única inversión que o Concello está a realizar para conformar o núcleo de centralidade parroquial de Salcedo. A reurbanización de toda a contorna dende o cemiterio até a Casa da Música, é outro dos proxectos ambiciosos que se comezará a executar en breve, e terá un custe superior aos 300.000 euros.