O IES Xulián Magariños de Negreira gañou esta tarde a fase galega do Club de Debate, nunha disputada final na que quedaron segundo o IES de O Carballiño e terceiro o IES Luís Seoane, de Pontevedra. Neste debate participaron 87 de oito centros de ensino de toda Galicia. Ademais dos tres primeiros, tamén participaron: o IES Leixa de Ferrol, o IES Isidro Parga Pondal de Carballo, o CPR Fogar de Santa Margarida, o Liceo La Paz da Coruña, os Miudiños do IES de Ames.
O premio para o equipo gañador será unha viaxe multiaventura dunha fin de semana a Penacova (Portugal), con contidos culturais, para un máximo de 20 persoas.
Cada un dos equipos estaba formado por entre 4 ou 10 rapaces de 3º ou 4º de ESO, 1º de Bacharelato ou ciclos formativos, sempre menores de 18 anos. Os equipos eran mixtos e coordinados por un preparador que é un docente do centro de ensino. Todos debatiron a favor e en contra do tema “En galego hai un mundo de cousas boas”.
O Club de Debate en Galicia
Por quinto ano consecutivo diversos concellos galegos, a través dos Servizos de Normalización Lingüística (SNL), organizaron o Club de Debate, un programa co que se incentiva o uso do galego oral en contextos formais e informais e o pensamento crítico. Na organización desta quinta edición participan once concellos: Ames, O Carballiño, Carballo, A Coruña, Ferrol, Narón, Negreira, Pontevedra, Rois, Santiago de Compostela e Teo. A fase final volve a Pontevedra, despois de pasar nas edicións anteriores por Pontevedra, Santiago de Compostela, Ferrol e Carballo.
Neste curso 2015-2016, o Club de Debate organizouse en catro fases de zona e nunha final galega. En cada unha das fases de zona os equipos clasificados recibiron cadanseu premio valorado en 500 e 300 euros.