- O edil de Deportes felicita a Paula Gavilanes, Paula Palacios, Carla Filgueira, Lidia Barrio e Marta Vicente antes do Campionato de España que terá lugar en Pamplona do 5 ao 10 de novembro
As compoñentes da equipa cadete base de mazas do Club de Ximnasia As Triscas de Pontevedra foron hoxe as protagonistas dunha recepción oficial organizada polo concelleiro de Deportes, Tino Fernández, “trala xesta obtida o pasado día 6 de outubro no Campionato Galego celebrado en Ourense, no que se proclamaron vencedoras e acadaron a clasificación para o Campionato de España coa mellor nota”. Tal e como lles transmitiu o edil socialista ás súas integrantes, Paula Gavilanes, Paula Palacios, Carla Filgueira, Lidia Barrio e Marta Vicente, “trátase dunha auténtica xesta, máxime tendo en conta que se trataba dun reto para elas, nunha das categorías con maior nivel, na que ademais eran novatas, e que realizaron un primeiro pase sen erros, conseguindo moita ventaxa con respecto ás rivais”.
Segundo puido apreciar Fernández no propio encontro coas deportistas, a equipa de mazas do Club As Triscas “é un grupo moi unido, non só nos tapices, senón tamén fóra deles, cargado de compañeirismo e con moita perseverancia”. “O seu logro non foi unha casualidade, xa que veñen colleitando éxitos dende hai un tempo. Esta mesma tempada, no nivel inferior (promoción), lograron subirse ao podio en diversos torneos, sendo ademais campionas provinciais”, suliñou Fernández.
A equipa formouse en 2016 e, xa ese mesmo ano, en categoría infantil, cun conxunto de aros e mazas, proclamáronse campionas provinciais e galegas. Ao ano seguinte, como cadetes de primeiro ano, alzáronse de novo ata o segundo chanzo do podio, converténdose en subcampionas galegas cun exercicio de cinco aros.
As mozas, que comezaron esta tempada na categoría de promoción e que non se marcaban obxectivos máis aló de traballar para facer unha boa participación no seguinte nivel (base), trasladáronlle ao concelleiro de Deportes que “seguen adestrando con moitas gañas e ilusión, pois entre os días 5 e 10 de novembro desputarán en Pamplona o seu primeiro Campionato de España, representando á nosa cidade, Pontevedra, en categoría cadete”.