“O éxito deste I Festival Gastronómico Mestizaxes está a ser tal que decidimos ampliar o horario de apertura da carpa situada na Praza de España para a xornada de clausura de mañá: inicialmente tiñamos pensado pechala ás 17:00 horas, pero imos estender esta festa de sabores de fóra até as 23:00 horas”. Así o anunciou esta mañá a concelleira de Promoción Económica e Turismo, Yoya Blanco, quen amosou a súa satisfacción “ante a boa acollida que están a ter a oferta lúdica e as propostas culinarias dos 10 stands instalados neste recinto de mestizaxe e cociña internacional feita desde Pontevedra”.
Unha oferta gastronómica na que, como lembrou a edil socialista, cada un dos restaurantes convidados presenta un menú composto por catro tapas salgadas e un doce. Asemade, tamén hai un posto con café de orixe (nunha reivindicación de que o café tamén é gastronomía) e outros dous para bebidas: a Indicación Xeográfica Protexida (IXP) Ribeiras do Morrazo achegará o viño e Estrella de Galicia a cervexa. En concreto, os pontevedreses estamos a ter a oportunidade de viaxar polas cociñas de:
- Perú, da man de Causa Street Food
- México, con La Catrina
- Venezuela, con Arepas Gastrobar
- Xapón, con Kenzo
- Chile, co Saudade
- Brasil, coa Croquetería El Crack
- China, con El Cafetín
- Estados Unidos, con Candela Grill Burguer
- Portugal, como país convidado
- Cociña Internacional Vegana
- Café de orixe, de El Club del Café
- O viño da IXP Ribeiras do Morrazo
- A cervexa de Estrella Galicia
O programa de actividades previsto para esta tarde inclúe ademais unha sesión nocturna con DJ T.O.T.S., mentres que na xornada de mañá terá lugar unha sesión vermú (ás 13:00 horas) con este mesmo artista.
