A veciñanza terá unha nova oportunidade de reservar a súa praza para un percorrido deste tipo o día 18 de febreiro, intre no que se abrirán as reservas para as visitas do mes de marzo
O concelleiro de Patrimonio Histórico, Xaquín Moreda, sinala que serán programadas máis visitas no caso de que prevaleza o interese da veciñanza á hora de visitar este espazo
Ás 17.28 horas de onte, todas as reservas para as primeiras visitas guiadas ao interior de Santa Clara, durante as fines de semana de febreiro, foron cubertas. Así, en menos de media hora desde a súa apertura, as 640 prazas dispoñíbeis foron distribuídas entre os interesados e interesadas en visitaren este novo espazo municipal.
O vindeiro 18 de febreiro, o sistema volverá ser activado para proceder coas reservas para as visitas de marzo. Aqueles que gozarán en febreiro destas visitas non poderán repetir, deixando oco para novos camiñantes e curiosos. De novo, serán 640 prazas, repartidas ao longo de 4 fines de semana, con 4 quendas de visitas cada sábado e cada domingo do mes. Os grupos volverán ser reducidos, de vinte perosas, para garantir a calidade da visita, amais da seguridade dos visitantes e do propio edificio.
Se ben a día de hoxe existe a posibilidade de se apuntar para a listaxe de espera das visitas de febreiro, é preciso indicar que esa listaxe de espera non serve para as visitas de marzo, xa que será obrigatorio volver encher o formulario en liña habilitado na páxina oficial www.santaclarapontevedra.gal. A lista de espera actual só serve para, no caso de que alguén cancele a súa reserva —xa adxudicada— poida acudir outra persoa, a seguinte na lista, por rigurosa orde de petición.
«A verdade que este tempo récord no que se esgotaron as prazas demostra o interese da veciñanza por Santa Clara», valora o concelleiro de Patrimonio Histórico, Xaquín Moreda. «Quero dicirlle a todos os pontevedreses que non se preocupen, que agora sacamos estes dous meses de visitas, pero se o interese segue vive, se segue habendo xente que queira coñecer Santa Clara, desde a concellaría de Patrimonio Histórico faremos o posíbel por aumentar o número de visitas nos vindeiros meses».