Na reunión mantida este venres coa concelleira de Promoción da Cidade, Anabel Gulías, foron sementadas as primeiras fórmulas de colaboración que dan boa conta da sintonía entre ambas as dúas partes
A Escola coruñesa sinalou que leva interesada na transformación urbana de Pontevedra e agarda poder máis elementos de colaboración alén da cita internacional que vivirá a cidade en setembro
A concelleira de Promoción da Cidade, Anabel Gulías, mantivo esta mañá, na Escola de Arquitectura de A Coruña, unha reunión co director da mesma, Plácido Lizancos, para presentarlle o evento que a organización Placemaking Europe está a preparar para a Boa Vila para este o mes de setembro.
«Foi unha reunión que nos deixou moi satisfeitas a todas as partes. Establecemos unha liña de comunicación para integrar a participación da Escola e do seu alumnado dentor deste evento e entre todos seguir traballando nas conexións que farán de Pontevedra durante ese mes unha cidade que estará nas miradas de todos os urbanistas e arquitectos do mundo», explica a edil.
A Placemaking Week Europe 2022 será un dos eventos máis importantes cos que contará a cidade ao longo do presente ano, e está a xerar grandes expectativas nos sectores especializados, por mor das propostas e das conexións que se xeran en citas desta categoría.
«Estamos moi contentas con este primeiro contacto, e quedamos xa co encargo de manter esta relación coa Escola de Arquitectura de A Coruña, que de seguro perdurará máis aló da Placemaking Week Europe, pois é certo que a transformación urbana de Pontevedra é obxecto de interese e estudio por parte da Escola, e o bo facer desta e o seu aval seguro que é unha ferramenta moi útil para o Concello nos vindeiros tempos. Imos buscar as formulas de traballo conxunto e continuaremos procurando elementos que permitan promocionar e poñer o nome de Pontevedra no mundo», sinalou Gulías.