Esta actuación aparecía incluída no ano 2014 dentro do propio plan sectorial de áreas empresariais de Galicia aprobado pola entidade autonómica
O alcalde, Miguel Anxo Fernández Lores, sinala que de non ampliarse a oferta de chan industrial no municipio estaríase a «estrangular» a posibilidade de acoller novos proxectos
O Concello de Pontevedra vén de solicitar de xeito oficial o desenvolvemento da ampliación do Polígono do Campiño, tal e como informou esta mañá o alcalde do municipio, Miguel Anxo Fernández Lores. «Trátase dunha ampliación inicialmente recollida na aprobación inicial do novo PXOM, xunto con outros polígonos industriais e zonas comerciais, que sumaban preto de dous millóns de metros cadrados de chan industrial e comercial, pero que tivo un informe negativo da Xunta de Galiza para a súa aprobación», lembrou o rexedor.
Co fin de dar contexto a toda a situación, Lores sinalou que a Xunta aprobou no 2014 o Plan sectorial de ordenación de áreas empresariais de Galiza, aparecendo aí unha ampliación para o polígono do Campiño, cunha superficie semellante en superficie e de situación a que estaba prevista polo Concello. «Tiña unha previsión de execución de entre 2015 e 2024. A propia Xestur alegou para que fose incluída —a ampliación— como unha área de carácter estratéxico a desenvolver na primeira parte dese período. O caso é que a día de hoxe non se iniciou ningunha tramitación e temos argumentos de sobra para pedir que se faga».
Lores indicou que «se a propia Xunta recolle este posicionamento, se ademais o Concello tamén quere que así se faga», non hai motivo para non facelo. «Temos o polígono industrial Campiño-Reigosa, que lle quedan 13 parcelas sen ocupar ou sen vender, e o de Curro 19… Haberá que facer unha previsión de nova creación de terreos informais. Se non se fai estaríase a estrangular a posibilidade de acoller proxectos. O polígono do Campiño ten todos os servizos necesarios —auga, saneamento…— e sería doado e máis económico facer a súa ampliación que establecer un polígono noutro espazo. Ademais está xa a punto de rematar a primeira fase da A-57, agardemos, polo que ofrecería unha conexión directa cunha boa vía».
O rexedor lembra que se pode executar algún proxecto por fases, que permita a súa finalización antes do 2026. «Este Concello está nun momento no que hai unha altísima actividade económica e non queremos que se vexa freada esa xeración de postos de traballo, e para iso é preciso que se leve a cabo a creación de novos terreos industriais. A Xunta ten competencia para desenvolvelos e contará co apoio do Concello».
O alcalde fixo fincapé en que a actividade económica existente en Pontevedra está máis que demostrada «a todos os niveis», polo que é preciso evitar calquera tipo de estrangulamento a curto ou medio prazo.