Os datos do Plan de Mobilidade Urbana Sostible (PMUS) que está e alaborar o Concello de Pontevedra revelan que a mobilidade en vehículo privado caeu á metade ao respecto de 2011.
Os indicadores de Pontevedra están moi por riba de cidades como Madrid, Barcelona, Bilbao ou Granada.
O Concello de Pontevedra continúa adiante coa análise dos datos que se desprenden do Plan de Mobilidade Urbana e Sostible (PMUS) que está a redactar o departamento que dirixe o concelleiro Demetrio Gómez. Entre as últimas cifras analizadas destacan as relativas á mobilidade da cidade: peonil, ciclista, transporte público e privado. Revelan que en dez anos a mobilidade peonil e ciclista de Pontevedra incrementou un 24%, situándose no 90% mentres que a mobilidade do vehículo privado caeu á metade, un pouco por riba do 14%.
Os datos dos que se nutre o PMUS proceden do Plan de tráfico e mobilidade da cidade de Pontevedra elaborado pola empresa PETTRA no ano 2011, e do Estudo de demanda de mobilidade na zona periurbana e proposta TAD que se está a desenvolver no marco da posta en marcha do transporte a demanda -Coche de Punto- no Concello. Estes datos son do ano 2021.
O estudo de PETTRA indicaba que o reparto modal de viaxes na cidade en 2011 seguía esta distribución:
- 66% dos desprazamentos facíanse a pé
- 5% dos desprazamentos facíanse en bicicleta e en transporte público
- 29% dos desprazamentos facíanse en vehículo privado
En 2021, segundo o Estudo de demanda de mobilidade na zona periurbana e proposta TAD que están a desenvolver as empresas Mcrit e Seteoitavas, existe a seguinte distribución modal para as viaxes con orixe e destino dentro da cidade de Pontevedra:
- 84’3% dos desprazamentos son de mobilidade activa peonil ou ciclista
- 1% dos desprazamentos son noutros medios de transporte que inclúen o transporte público
- 14’7% dos desprazamentos son en vehículo privado
O PMUS, logo de ponderar os datos, sitúa no 90% os desprazamentos de base peonil e ciclista xa que engade aqueles que fan as persoas que veñen de fóra da cidade, logo de estacionar os seus vehículos.
Pódese concluir, polo tanto, que a mobilidade peonil en Pontevedra evoluiu positivamente acadando resultados aos que non se achega ningunha cidade do estado, froito da permanente aposta por unha cidade para as persoas e polo respecto ao medio ambiente.
Mostra diso é a comparativa con outras cidades do Estado como Madrid, Bilbao, Gasteiz ou Barcelona. Segundo os datos achegados pola Dirección Xeral de Tráfico (DXT) das principais cidades do Estado, a mobilidade peonil oscila entre o 27% da mobilidade peonil de Madrid e os 65% de Bilbao ou o 68% de Gasteiz. Todas elas moi lonxe do 90% de Pontevedra.
Estas cidades son maiores que Pontevedra, polo que teñen un uso maior do transporte público, pero tamén teñen un maior uso do vehículo privado con datos que só en Bilbao (12%) e Barcelona (15%) se achegan ao 10% de Pontevedra.
Ao mesmo tempo teñen unha distribución modal da mobilidade que implica unhas máis emisións de gases de efecto invernadoiro ao sumar o transporte público e os vehículos privados.
Estes datos tamén revelan que Pontevedra cumpre os obxectivos das Zonas de Baixas Emisións (ZBE) e, polo tanto, non é preciso cobrar unha peaxe por circular ou aparcar, ou que se obrigue a veciñanza a cambiar de coche mentres se reduzan e controlen os tráficos innecesarios.